አብነቱ ማንነቱ ፤ ማንነቱ አብነቱ

ቅኔ ቆጥረው ቅሬ ዘርፈው

አኩፋዳ ቅምጫና ይዘው

ተማሪዎችሽ ፍርፋሪ ቁራሽ አጥተው

ከውሻ ጋር ትግል ገጥመው

ያቆዩልን በቁስል በደም በሞታቸው

አይዘጋ አይታጠፍ ወንበሩ

የታላቁ ሰው የመምህሩ

ቀለም ብዕር ብራናውን አዘጋጅተሽ

አንቺው ቀርጸሽ አንቺው ድጠሽ

አሐዝ ቀርጸሽ ቃላት ጽፈሽ

ለአዲስ ትውልድ አስተላልፈሽ

አመሥጥረሽ አስተምረሽ ብሉይ ከሐዲስ

ማርይስሐቅ አረጋዊ መንፈሳዊ ፊሊከሰዩስ

ሥርዓትሽ ፍትሐ ነገሥት ዲድስቅልያ

ያቆየሽዉ ምንጩ አንቺነሽ አቅሌስያ

ዘአምላኪየ ጉባኤ ቃና ቅኔ ዘርፈሽ

ሥዕላቱ እንዲነበቡ መልክ ሰጥተሽ

ታሪክ ገልጠሽ ቅርስ አኑረሽ

ለትውልዱ እንዲቆየው

ማንነቱን እንዲረዳ እንዲለየው

አትንጠፊ አትድረቂ እንዳይቆጨው

ሕግ ፍትሕ አስተዳደር

እንዲሠራ በዚች ምድር

ፈር የቀደድሽ የከፈትሽ በር

ቀን ቆጥረሽ ዘመን ቀምረሽ

ለዓለም ሕዝብ ባስተዋውቅሽ

ወንበር አጥፈው መምህራንሽ

ለምን ይበተኑ ይሰደዱ ተማሪዎችሽ

በቅኝ ገዢዎች ሴራ ገብተው

ያንቺው ልጆች ያንቺው ማኀፀን ያፈራቸው

አብነቱ እንዲጠፋ

ዘረኝነት እንዲሰፋፋ

እንዲዘረፍ ሀብትሽ ቅርስሽ

አስተዋጽኦ አረጉብሽ

ልጆቻችን ከእኛ ወጥተው

ባህል ወጉን ሁሉን አጥተው

ባእድ ሆነው ባዕድ መስለው

በቤታቸው ባገራቸው

በምንጫቸው በወንዛቸው

ጨከኑባት ሳይገባቸው

አዘኑለት ለነገው ሰው

ያለታሪክ ማንነቱን ለማያውቀው

ነበር እንጂ አለ ተብሎ ላይታየው

ከቶ አይጥፋ አይደምሰስ መለያው

ካልበረታን ካልተባበርን

አብነቱን ካልገነባን

አቤት የነገው እጣ ሲዘገንን፡፡

ወስብሐት ለእግዚአብሔር

by: Martha Shita